Shule ya Sekondari ya Korogwe Girls yasafirisha wanafunzi

Posted on: March 20th, 2020

Shule ya Sekondari ya Korogwe Girls yasafirisha wanafunzi

Uongozi wa Shule ya Sekondari ya  Korogwe Girls iliyopo Wilaya ya Korogwe, Mkoa wa Tanga imekamilisha mchakato wa kusafirisha wanafunzi wote baada ya tamko la Serikali la Machi 17, mwaka huu kutaka shule zote zifungwe kuanzia shule za awali hadi Kidato cha sita kwa lengo la kupambana na maradhi ya Corona.

Akizungumzia mchakato huo, Bi. Annisia Mauka ambaye ni Mkuu wa Shule ya Sekondari ya Korogwe Girls alisema “ tumekamilisha mchakato wa kusafirisha wanafunzi wote kurudi nyumbani”. Bi. Mauka aliendele kufafanua kuwa mchakato wa kusafirisha wanafunzi takribani mia tisa sabini na saba (977) kuelekea mikoa mbalimbali hapa nchini ulichukua siku tatu kuanzia Jumatano hadi leo Ijumaa kutokana na changamoto ya usafiri.

Katika hatua nyingine Bi. Mauka ametoa ushauri kwa  Shirika la Reli Tanzani  ambalo linafanya safari zake Kati ya Dar es salaam na Arusha kuchangamkia fursa za kusafirisha wanafunzi wanaoelekea Mikoa ya Kanda ya Pwani pamoja na Kanda ya Kaskazini. Katika kipindi cha likizo kuna changamoto kubwa ya usafiri hivyo shirika la reli Tanzania linaweza kuwa mkombozi mkubwa  kwa wanafunzi.

Nae  Mwl. Boniface Kinyemi kutoka shule ya Sekondari ya Korogwe Girls ambaye anaratibu mchakato  wa kusafirisha wanafunzi hapo shuleni alisema “ taratibu zote za safari zinakwenda vyema na mpaka kufikia leo Ijuma wanafunzi wote watafanikiwa kwenda nyumbani”. Kwa upande mwingine wanafunzi walitoa shukrani kwa  uongozi wa shule kwa jitihada walizofanya katika kuhakikisha wanapata usafiri wa kurudi nyumbani.