Wanawake wa Mji wa Korogwe waadhimisha siku ya wanawake duniani

Posted on: March 8th, 2020

Wanawake wa mji wa korogwe waadhimisha siku ya wanawake duniani

Wanawake katika Halmashauri ya Mji wa Korogwe wameadhimisha siku ya wanawake duniani, siku ambayo huadhimishwa dunia nzima ifikapo Machi 8, ya kila mwaka. Maadhimisho ya mwaka huu alifanyika katika eneo la Soko la Kilole lililopo jirani na Kituo kikubwa cha mabasi cha Kilole.

Katika maadhimisho hayo mgeni rasmi alikua Mh. Kissa Kasongwa ambaye ni Mkuu wa Wilaya ya Korogwe.  Wakati wa hotuba Mh. Kasongwa aliwapongeza wanawake kwa jidihada wanazofanya katika kujiletea maendeleo na alisema “ Serikali  itahakikisha  Halmashauri inatenga fedha asilimia kumi (10%)  ya mapato ya ndani kwa ajili ya mikopo ya wanawake ili waweze kujiajiri kupitia shuighuli  mabalimbali za ujasiriamali.”

Akizungumzia maadhimisho hayo  ndugu Charity Sichoma ambaye ni Afisa Maendeleo ya Jamii katika Halmashauri ya Mji wa Korogwe alisema kuwa siku ya wanawake  duniani ni siku ambayo huadhimishwa kila mwaka kwa lengo kuelimisha wanawake kuhusu kupinga vitendo vya unyanyasaji, unyonyaji na ukandamizaji kwa wanawake kijinsia, kiuchumi, kiutamaduni na kiutawala.  Kauli mbiu ya  mwaka mwaka  2020 ni “ kizazi cha usawa kwa maendeleo ya Tanzania ya sasa na badae”

Kwa upande mwingine Bi. Naomi Frederick kutoka Taasisi ya Kupambana na Kuzuia  Rushwa  aliwaasa wanawake kujiepusha na rushwa ya ngono  wakati kwakuomba kazi, kipindi cha uchaguzi au  kwa ajili ya kupewa upendeleo wa aina yoyote. Nae Bi. Jane Samkieli kutoka kikundi cha Agape kinachojishughulisha na kazi za mikono alisema “wanawake tunafuraha kubwa kukutana pamoja katika  siku ya wanawake duniani, siku ya leo itatusaidia  kubadilishana mawazo ya namna ya kujiajiri pamoja na kutafuta fursa za kiuchumi”

Katika  Mji wa Korogwe maadhimisho hayo yaliambatana  na utolewaji wa huduma za afya pamoja na matukio mbalimbali  kama za vile  upimaji wa kansa ya  mlango wa kizazi pamoja na kansa ya matiti, chanjo ya kansa ya matiti kwa wasichana pamoja na  kufanya vipimo vya virusi vya ukimwi  (HIV) na ushauri nasaha. Pia kulitolewa elimu ya kupambana na rushwa, elimu ya ndoa, miradhi na usia  vilevile upandaji wa miti ya aina mbalimbali.