Mchakato wa baadhi ya maeneo ya Wilaya ya Korogwe kuhamia Mji wa Korogwe waiva, Halmashauri zote mbili zaafikiana

Posted on: January 17th, 2020

Mchakato wa baadhi ya maeneo ya Wilaya ya Korogwe kuhamia Mji wa Korogwe waiva, Halmashauri zote mbili zaafikiana

Halmashauri ya Mji wa Korogwe na Halmashauri ya Wilaya ya Korogwe zimekutana kujadili namna ya kukabidhiana  baadhi ya maeneo ya kiutawala kutoka Halmashauri ya Wilaya ya Korogwe kwenda Halmashauri ya Mji wa Korogwe. Halmashauri hizo zimekutana katika kikao maalumu cha baraza la ushauri wa kisheria katika Wilaya ya Korogwe. Kikao hicho kilifanyika Januari 17, mwaka huu katika ukumbi wa mikutano uliopo Halmashauri ya Mji wa Korogwe.

Akizungumzia mchakato huu Mh. Kissagwakisa Kasongwa  ambaye ni Mkuu wa Wilaya ya Korogwe alisema  kuwa mchakato huu umetokana na  kuhama kwa Halmashauri ya Wilaya ya Korogwe kwenda eneo la Kwasunga katika kutekeleza agizo la Mh. Dkt. John Pombe Magufuli  Rais wa Jamhuri ya Muungano wa Tanzania  pamoja na agizo la Mh. Selemani Jafo Waziri wa nchi Ofisi ya Rais Tawala za Mikoa na Serikali za Mitaa.

 Wajumbe wa Halmashauri zote  mbili  walitoa baraka zao kuridhia  mchakato huu hivyo kuendelea kwa ngazi ya Mkoa na hatua nyinginezo. Maeneo yaliyopendekezwa kuhamia Halmashauri ya Mji wa Korogwe ni Kata zote zilizopo Tarafa ya Korogwe na Magoma ambazo ziko kumi (10), Vijiji arobaini na moja  (41) pamoja na Vitongoji miambili na tano (205). Lengo kuu la kuhamisha maeneo haya Kutoka Halmashauri ya Wilaya ya Korogwe kwenda Halmashauri ya Mji wa Korogwe ni kuwawezesha wanachi wa maeneo haya kupata huduma za kijamii kwa haraka.