Timu ya Kampeni ya Chanjo ya Uviko -19 yatembelea Magereza

Posted on: October 3rd, 2021

Timu ya Kampeni ya Chanjo ya Uviko -19 yatembelea Magereza 

Wafungwa kutoka  Gereza  la Wilaya ya Korogwe pamoja  na Gereza la Kwamngumi yaliyopo katika Mji wa Korogwe wamepatiwa Chanjo ya Uviko -19 ikiwa ni jitihada za Serikali kuyafikia makundi mbalimbali kwa lengo la kuwaelimisha pamoja na kuwahamasisha ili wapate  Chanjo ya Uviko -19. Zoezi la kuwapatia   Chanjo Wafungwa hao limefanyika Oktoba 03, mwaka huu ikiwa ni muendelezo wa Kampeni ya utoaji wa Chanjo ya Uviko -19 Nyumba kwa Nyumba.

“Natoa pongezi kwa Serikali kwa  kujumuisha Magereza katika mpango wa kupatiwa  Chanjo ya Uviko -19, Magereza pia ni sehemu ya mkusanyiko wa watu” alisema  SSP. Cristopher Mwenda ambaye ni Mkuu wa Gereza la Kwamngumi. SSP. Mwenda alifafanua kuwa Wafungwa ni sehemu ya jamii hivyo Timu nyingine za Wataalamu wa Afya kutoka Serikalini zinakaribishwa kutoa elimu pamoja na matibabu ya magojwa mengine.

Nae Dkt. Salma Sued ambaye ni Mganga Mkuu wa Halmashauri ya Mji wa Korogwe  alitoa shukrani kwa Uongozi wa Gereza la Wilaya ya Korogwe pamoja na Gereza la Kwamngumi  kwa kutoa kibali cha ruhusa ya kutoa  hamasa pamoja na Chanjo ya Uviko -19 kwa Wafungwa.   Dkt. Sued Alifafanua kuwa utamaduni wa kuwatembelea Wafungwa waliopo katika Magereza hayo utakuwa endelevu kwa lengo la kuwapatia elimu ya afya pamoja na matibabu ya magojwa mbalimbali.