Wasimamizi wa uchaguzi Jimbo la Korogwe Mjini wapewa mafunzo

Posted on: October 25th, 2020

Wasimamizi wa uchaguzi Jimbo la Korogwe Mjini wapewa mafunzo

Msimamizi wa uchaguzi Jimbo la Korogwe Mjini Ndugu Nicodemus Bei ametoa mafunzo kwa wasimamizi takribani 568 wa uchaguzi mkuu unaotarajiwa kufanyika siku ya Jumanato, Oktoba 28, mwaka huu. Mafunzo hayo yalioambatana pamoja na kiapo cha uchaguzi yamefanyika Oktoba 25, mwaka huu katika ukumbi wa Halmashauri ya Mji wa Korogwe.

Mafunzo hayo ya uchaguzi yalitolewa kwa lengo la kuwafunda  wafanyakazi mbalimbali ambao wanatarajiwa kushiriki kwenye  kazi za  uchaguzi ili waweze kufanya kazi kwa ufanisi. Wafanyakazi hao ni pamoja Wasimamizi wakuu 142, Wasimamizi wasaidizi 284, pamoja na Makarani waongozaji 142. Kuhusu mgawanyo wa maeneo, Jimbo la Korogwe Mjini limegawanywa katika Kata Kumi na Moja huku likiwa na idadi ya vituo vya kupigia kura 142.

“Wasimamizi wa uchaguzi mnatakiwa kufanya kazi kwa weledi mkubwa, uadilifu pamoja na kuzingatia kanuni na taratibu zote za uchaguzi” Ndugu Nicodemus Bie ambaye ni Msimamizi wa Jimbo la Korogwe Mjini alisema. Ndugu Bei  aliendelea kusisitiza kwa kusema “ “wasimamizi wa uchaguzi mnatakiwa kujiepusha na itikadi za chama chochote cha siasa wakati wa kufanya kazi na  yeyote atakayekiuka atachukuliwa hatua kali za kisheria”.

Kwa upande mwingine, washiriki wote mafunzo baada ya kula kiapo cha uchaguzi waliahidi kuwa watafanya kazi kwa uadilifu mkubwa wakizingatia kanuni na taratibu zote za uchaguzi.