Mji wa Korogwe wapata Mradi wa ujenzi wa mfumo wa kisasa wa Maji Taka

Posted on: January 11th, 2023

Mji wa Korogwe wapata Mradi wa ujenzi wa mfumo wa kisasa wa Maji Taka

Shirika la BORDA linatarajia kutoa fedha kiasi cha Shilingi Milioni 246 kwa ajili ya Ujenzi wa Mradi wa Mfumo wa Kupokea, Kuchakata na Kutibu Maji Taka katika Halmashauri ya Mji wa Korogwe. Utekelezaji wa Ujenzi wa Mradi  huo ulitangazwa Januari 10, Mwaka huu wakati Kamati ya Mipango Miji na Mazingira wakiwa na Uongozi wa Shirika la Maji Safi na Usafi wa Mazingira Korogwe (KUWASA) ambao ndio wasimamizi wa  Ujenzi pamoja na Uendeshaji wa Mradi huo walipotembelea Kata ya Bagamoyo kwa ajili ya ukaguzi wa eneo la mradi.

“Mradi huu utakapokamilika licha ya kutunza mazingira pia utasaidia kutoa ajira  kwa Wananchi ” alisema Bw. Michael Ntulo ambaye ni Mhandisi kutoka Shirika la KUWASA ambao ndio wenye dhamana ya usimamizi wa mradi huo.  Bw. Ntulo alifafanua kuwa Ujenzi wa Mradi huo utaambatana na upatikanaji wa Gari pamoja na Guta la kubebea Maji Taka ambapo Gari na Guta hilo litatumika kubeba Maji Taka kutoka kwa Wananchi kwa gharama nafuu  ili kupunguza gharama za uchukuzi ukilinganisha na ghrama zinazotumika kwa sasa.

Akizungumzia utekelezji Mradi wa Ujenzi Mfumo wa Kisasa wa Maji Taka Katika Mji wa Korogwe Katibu Tawala wa Wilaya ya Korogwe Bi. Rahel Muhando alisema “ Ujenzi wa  Mfumo wa Kisasa wa Maji Taka katika  Mji wa Korogwe ni jambo jema na Mradi huu utakuwa na tija kwa Wananchi. Mimi natoa baraka zote kwa ajili ua utekelezi wa Mradi huu”.

“Madiwani pamoja na Wataalamu wote wa Halmashauri ya Mji wa Korogwe tunatoa shukrani kwa  Shirika la BORDA kwa kutupatia Mradi wa Ujenzi wa Mfumo wa Kisasa wa Maji Taka, Mradi tumeupokea na tuko tayari kwa utekelezaji wake” alisema Mhe. Rajabu Mzige ambaye ni Diwani wa Kata ya Manundu na ndiye Mwenyekiti wa Kamati ya  Mipango Miji  na Mazingira.