Mji wa Korogwe wajenga vyoo vya kisasa

Posted on: November 24th, 2020

Mji wa Korogwe wajenga vyoo vya kisasa

Mkurugenzi wa Halmashauri ya Mji wa Korogwe akiambatana pamoja na Wakuu wa Idara ametembelea miradi wa ujenzi wa  matundu ya vyoo vya kisasa kwa ajili ya  shule mbalimbali za msingi. Ziara hiyo imefanyika Novemba 24, mwaka huu katika shule za Msingi zilizopo Mji wa Korogwe.

Halmashauri ya Mji wa Korogwe katika mwaka wa fedha 2020/2021 inatarajia kujenga matundu ya vyoo Hamsini na Tatu  (53) katika  shule  mbalimbali za msingi  kwa lengo la kupunguza changamoto  za matundu ya  vyoo zilizopo kwenye shule hizo. Ujenzi huo unatekelezwa  kwa kutumia fedha za ndani takribani Milioni Arobaini (40) pamoja na nguvu za wananchi.

“kwa kushirikiana na wananchi, Halmashauri  tutahakikisha tunamaliza kabisa changamoto ya matundu ya vyoo katika shule za msingi”  alisema Ndugu Nicodemus Bei ambaye ni Mkurugenzi wa Halmashauri ya Mji wa Korogwe wakati wa ziara hiyo. Ndugu Bei alifafanua zaidi kwa kusema “miradi itakapokamilika  itakuwa ni faraja  kwa wanafunzi na kuwawezesha kusoma kwa furaha”

Nae Mhandisi Said Abuu ambaye ni Mhandisi katika Halmashauri ya Mji wa Korogwe na msimamizi wa miradi hiyo alifafanua kuwa Shule ambazo miradi tayari imekamilika ni pamoja na Shule ya Msingi Kilole matundu (8), Matondoro matundu (10), New Korogwe matundu (8), na Old Korogwe matundu (6).

Mhandisi Abuu aliendelea kufafanua kuwa shule ambazo ujenzi  unaendelea ni pamoja na  Shule ya Msingi Bagamoyo matundu (9), Kwamkole matundu (6) pamoja na  Kwamngumi matundu (6).   Kuhusu ukarabati wa matundu ya vyoo katika shule za msingi, Mhandisi Abuu alisema “ tayari tumeanza na Shule ya Msingi Mgombezi tukiifanyia ukarabati wa matundu ya vyoo kumi na nne (14)”.

Kwa upande mwingine,  Ndugu Kassimu Kaoneka ambaye ni Afisa Elimu Msingi katika Halmashauri ya Mji wa Korogwe  pamoja na Walimu Wakuu waliopata miradi hiyo wameishukuru Halmashauri kwa kutoa fedha pamoja wananchi kwa kuchangia  nguvu kazi ili kufanikisha miradi hiyo.