Mwanaidi Rajabu: Acheni kutumia muda wa kazi za Umma kufanya kazi binafsi

Posted on: August 22nd, 2023

Mwanaidi Rajabu: Acheni kutumia muda wa kazi za Umma kufanya kazi binafsi

Katibu Tawala wa Wilaya ya Korogwe (DAS) Bi. Mwanaidi Rajabu amewataka Watumishi wa Umma katika Halmashauri ya Wilaya ya Korogwe pamoja na Halmashauri ya Mji wa Korogwe kujiepusha kutumia muda wa kazi za Umma kufanya kazi Binafsi. Wito huo aliutoa wakati wa Kikao Maalumu cha Kujitambulisha rasmi kwa Watumishi wa Halmashauri hizo pamoja na kukumbushana Kanuni naTaratibu za utumishi wa Umma. Kikao hicho kilifanyika Agosti 22, Mwaka huu katika Ukumbi wa Mikutano wa Halmashauri ya Mji wa Korogwe.

“Watumishi wezangu tujiepushe kutumia muda wa kazi za Umma kwenda kufanya kazi Binafsi” alisema Bi. Mwanaidi Rajabu ambaye ni Katibu Tawala (DAS) wa Wilaya ya Korogwe wakati akizungumza na Watumishi wa Halmashauri ya Wilaya ya Korogwe pamoja na Halmashauri ya Mji wa Korogwe. Bi. Mwanaidi alifafanua kuwa Mtumishi anapotumia muda wa kazi za Umma kufanya kazi Binafsi anazoroteja jitihada za serikali katika kuwaletea Wananchi maendeleo pamoja na kwenda kinyume na Kanuni na Taratibu za Utumishi wa Umma.

Katika hatua nyengine, Bi. Mwanaidi Rajabu amewataka Watumishi wa Umma wafanye kazi kwa bidii na kwa umakini mkubwa sambamba na kutumia lugha ya busara wakati wa kuwahudumia Wananchi.  Nao  Wakurugenzi wa Halmashauri zote mbili, Wilaya ya Korogwe pamoja na Mji wa Korogwe  walitoa Shukrani kwa  Katibu Tawala kwa  jinsi alivyotoa nasaha za Kiutumishi kwa Watumishi na kumuahidi kusimamia kwa umakini Kanuni na Taratibu za Utumishi wa Umma kwa lengo la kuongeza ufanishi na uwajibikaji kwa Watumishi.