Halmashauri ya Mji wa Korogwe yatoa mafunzo ya kisheria kwa mabaraza ya Kata

Posted on: October 4th, 2019

Halmashauri ya Mji  wa Korogwe yatoa mafunzo ya kisheria kwa mabaraza ya Kata

Halmashauri ya Mji wa Korogwe imetoa mafunzo ya kisheia kwa mabaraza  kumi na moja ya kata kwa lengo la kuwajengea uwezo wa kisheria ili kupunguza migogoro ya  kisheria inazojitokeza katika jamii. Mafunzo haya ya siku tatu yalifunguliwa  Oktoba 2, mwaka huu na Mkurugenzi Mtendaji wa Halmashauriya Mji wa Korogwe Ndugu Nicodemus Bei katika ukumbi wa mikutano wa Halmashauri ya Mji wa Korogwe.

Akizungumzia mafunzo haya mwanasheria msaidizi wa Halmashauri ya Mji wa Korogwe Ndugu Mussa Dotti  alisema mafunzo haya  yapo kisheria katika sheria ya mabaraza ya Kata sura 206 rejeo la 2002, hivyo wameandaa mafunzo haya ili kuwajengea uwezo mabaraza ya kata katika  kutatua migogoro na kutoa ushauri wa kisheria katika maeneo wanayoishi. Bwana Dotti alifafanua kuwa  maeneo makuu yanayohitaji utatuzi  wa kisheria ni ardhi na kesi ndogondogo katika jamii. 

Kwa upande mwingine Bi. Susana Joseph ambaye pia ni mwanasheria msaidizi wa Halmashauri ya Mji wa Korogwe  alisema  katika siku za karibuni kumeongezeka migogoro mingi ya ardhi katika jamii hivyo mafunzo haya ya kisheria  kwa mabaraza ya kata yatasaidia pupunguza changamoto za ardhi zinazojitokeza.

Nae Bwana Afred Dege ambaye ni mshiriki wa mafunzo haya kutoka kata ya Magunga alisema mafunzo haya ya kisheria  yatawasaidia  kutatua migogoro na kutoa ushauri wa kisheria katika jamii kwa sababu walikuwa wanafanya kazi kwa mazoea . Pia Bi. Felista Nyonjele mshiriki kutoka Kata ya Manundu ameishukuru Halmashauri ya Mji wa Korogwe kwa kuandaa mafunzo haya ya kisheria na elimu waliyoipata itawasaidia kufanya kazi kwa ufanisi.