Madiwani wa Mji wa Korogwe wakutana katika kikao maalumu, Wajadili namna ya kupokea maeneo ya utawala kutoka Wilaya ya Korogwe

Posted on: January 7th, 2020

Madiwani  wa Mji wa Korogwe wakutana katika kikao maalumu, Wajadili namna ya kupokea maeneo ya utawala kutoka Wilaya ya Korogwe

Baraza la Madiwani la Halmashauri ya Mji wa Korogwe limekutana katika kikao maalumu ambacho kimejadili  namna ya kujiandaa na mapokezi ya baadhi ya maeneo ya utawala kutoka Halmashauri ya Wilaya ya Korogwe. Kikao hicho kimefanyika Januari 7, mwaka huu  katika ukumbi wa  mikutano uliopo  Halmashauri  ya Mji wa Korogwe.

Akiwasilisha taarifa hiyo kwa Waheshimiwa Madiwani, ndugu Charles Mtali ambaye ni Afisa Uchaguzi wa Halmashauri ya Mji wa Korogwe akimuakilisha Mkurugenzi alisema kuwa maeneo yanayopendekezwa ni Kata zote zilizopo Tarafa ya Korogwe na Magoma ambazo ziko kumi (10), Vijiji arobaini na moja  (41) pamoja na Vitongoji miambili na tano (205).  

Ndugu Mtali Aliendelea kufafanua kuwa mchakato huu umetokana na  kuhama kwa Halmashauri ya Wilaya ya Korogwe kwenda eneo la Kwasunga katika kutekeleza agizo la Mh. Dkt. John Pombe Magufuli  Rais wa Jamhuri ya Muungano wa Tanzania  pamoja na agizo la Mh. Selemani Jafo Waziri wa nchi Ofisi ya Rais Tawala za Mikoa na Serikali za Mitaa.

Nae  Mh. Hillary Ngonyani ambaye ni  Mwenyekiti wa Halmashauri ya Mji wa Korogwe baada ya kupokea taarifa hizo alisema  kuwa maeneo watakayopokea  yatakua  karibu na makao makuu ya Halmashauri ya Mji wa Korogwe hivyo wananchi watapata huduma za jamii kwa wepesi. Kwa upande mwingine Waheshimiwa Madiwani wa Halmashauri ya Mji wa Korogwe walisema kuwa wako tayari kupokea maeneo hayo.