Msimamizi wa uchaguzi Halmashauri ya Mji wa Korogwe amekutana na Viongozi wa Vyama vya Siasa

Posted on: September 20th, 2019

Msimamizi wa uchaguzi Halmashauri ya Mji wa Korogwe amekutana na Viongozi wa Vyama vya Siasa

Msimamizi wa uchaguzi Halmashauri ya Mji wa Korogwe Bwana Kasimu Kaoneka amekutana na viongozi wa vyama mbalimbali vya siasa  pamoja na wasimamizi wasaidizi  wa uchaguzi kwa lengo la kufahamiana vilevile kuelimishana kuhusu kanuni na sheria za uchaguzi wa serikali za mitaa unaotarajiwa kufanyika mwezi novemba mwaka huu.

 Mkutano huo ulifanyika septemba 18, katika ukumbi  wa mikutano wa wa Halmashauri ya Mji Korogwe. Katika mkutano huo Bwana Kaoneka aliambatana  na Afisa Uchaguzi wa Halmashauri ya Mji wa Korogwe Bwana Charles Mtali wote kwa pamoja walitoa elimu ya uchaguzi wa serikali za mitaa huku wakisisitiza umuhimu wa kufuatwa kanuni na sheria za uchaguzi ili kuepukana na changamoto mbalimbali ambazo zinaweza kujitokeza.  

Bwana Mtali aliendelea kusema  kuwa uchaguzi huu utahusisha Vijiji pamoja na Mitaa  katika wa Halmashauri ya Mji wa Korogwe yenye mitaa 22 na vitongoji 35 ambapo kutakuwa na jumla ya vituo 62 vya kuandikisha na kupiga kura.  Aliainisha eneo la Mitaa litakuwa lina vituo 27 na  eneo la Vijiji litakuwa na vituo 35.

Kwa upande mwingine Mwanasheria wa Halmashauri ya Mji wa Korogwe ambaye pia ni msimsmizi msaidizi wa uchaguzi Ndugu Magdalena John, amewasishi viongozI wa vyama vya siasa na wasimamizi wa uchaguzi  kutumia kanuni na sheria za uchaguzi wa serikali za mitaa ili kuepuka kupotoshwa na watu wengine.