Wanafunzi 1343 wajiunga darasa la kwanza katika Mji wa Korogwe

Posted on: January 15th, 2021

Wanafunzi 1343 wajiunga darasa la kwanza katika Mji wa Korogwe

 Halmashauri ya Mji wa Korogwe  imefanikisha  kuandikishaji jumla ya wanafunzi 1343 wanaotarajia kujiunga na  darasa la kwanza  kwa mwaka 2021. Wavulana walioandikishwa  ni 672  na Wasichana ni 671 ambapo  wastani wake ni sawa na  Wavulana asilimia 63 na Wasichana ni  asilimia 65. Mchakato huo wa uandikishaji ulianza Oktoba 1, mwaka 2020 katika shule zote za Serikali katika Mji wa Korogwe na unatarajiwa kukamilika  Machi 31, mwaka huu.

 “Halmashauri ya Mji wa Korogwe tunatarajia kusajili jumla ya wanafunzi 2109 kwa ajili ya   darasa la kwanza kwa mwaka 2021” alisema Ndugu Meinrad Komba ambaye ni Afisa Elimu Takwimu katika Idara ya Msingi. Ndugu Komba  alifafanua kuwa  uandikishaji wa wanafunzi hao 2109 unajumlisha Wavulana 1073 pamoja na Wasichana 1036.

“Katika shule yetu wazazi wana muitikio mkubwa katika kuandikisha wanafunzi wa darasa la kwanza” alisema Mwl. Hamisi Mketo ambaye ni Mwalimu Mkuu wa Shule ya Msingi Manundu Mazoezi wakati wa  ufuatiliaji wa mchakato wa uandikishaji wa darasa la kwanza kwa mwaka 2021. Kwa upande mwingine Wazazi walioshiriki katika mchakato wa uandikishaji wa wanafunzi waliishukuru Serikali kwa kuweka utaratibu mzuri wa uandikishaji wa wanafunzi.