Wilaya ya Korogwe yapata mafunzo ya ufugaji wa nyuki

Posted on: March 16th, 2020

 Wilaya ya Korogwe yapata mafunzo ya ufugaji wa nyuki

Mwenyekiti wa Jumuiya ya Wazazi Tanzania Mh. Edmund Mndolwa amefungua mafunzo  ya ufugaji wa nyuki  kwa Mkoa wa Tanga. Mafunzo ambayo pia yalihudhuriwa na Mh. Kissa Kasongwa ambaye ni mkuu wa Wilaya ya Korogwe pamoja na Wakurugenzi kutoka Halmashauri zote mbili za  Wilaya ya Korogwe. mafunzo hayo yalizinduliwa  Machi 16, mwaka huu katika ukumbi wa mikutano wa Halmashauri ya Mji wa Korogwe.

Akizungumzia mafunzo hayo Mh. Edmund Mndolwa ambaye ni Mwenyekiti wa Jumuiya ya wazazi Tanzania alisema “lengo la mafunzo haya ni kuhamasisha ufugaji nyuki kwa vijana na vikundi kwa ujumla ili wajikwamue kiuchumi”. Mh. Mndolwa  alifafanua kuwa kwa sasa ufugaji wa nyuki unalipa na ni  muda muafaka kwa vijana kujiajiri kupitia ufugaji wa nyuki

Katika hatua nyingine Mh. Mndolwa  amewahakikishia wafugaji wa nyuki kuwa  kuna soko la kutosha la bidhaa za nyuki ndani na nje ya nchi. Alitoa ushauri kwa wafugaji watumie mizinga ya kisasa ili wapate asali ya kutosha pamoja na bidhaa nyingine za nyuki. Pia alitoa maelekezo kwa Jumuiya ya wazazi katika kila Wilaya  watenge hekari moja kwa ajili ya ufugaji wa nyuki.

Nae Bi. Groria Joseph mwezeshaji wa mafuzo  kutoka chuo cha International Beekiping Openi School kilichopo  Mkoani  Singida alisema “ ni vyema vijana tukachangamkia fursa ya ufugaji wa nyuki  ili kuongeza kipato pamoja na kupata lishe bora kwa ajili ya afya zetu” Bi. Groria alifafanua kuwa ufugaji wa nyuki una tija kubwa kwa mfugaji  ikiwepo kupata  bidhaa  kama vile asali, nta, pamoja na gundi ya nyuki. Bidhaa nyingine ni  sumu ya nyuki, supu ya nyuki,  maziwa ya nyuki na chavua.

 Kwa upande mwingine Bi. Rehema Kazenga ambaye ni mshiriki wa mafunzo ya ufugaji wa nyuki kutoka Mji wa Korogwe aliishukuru Jumuia ya Wazazi Tanzania kwa kuandaa mafunzo ya ufugaji wa nyuki kwa kuwa mafunzo  haya yatawasaidia vijana pamoja na vikundi vyengine kujiajiri kupitia ufugaji wa nyuki.